صبآحْ / مساء الخير ع كل الحلوين 
وكل اللي يهمهم يكونوا حلوين .." 
+ وبأحلى طلة كمآنْ.." +
تدوينتي اليوم خَص نَص لنفسي قبل ماتكون لكم
كلنا نروح السوق واي قطعة تعجبنا نشتريها من غير
مانفكر حتى اذا هيا حتكون حلوة علينا او لآ ..!!؟
اوقات كثييييير وانا متأكدة انو اغلبكم مر بهالموقف انو نشوف وحدة تانية
لآبسة نفس القطعة وطالعة حلوة عليها ..!! ؟؟ كيف ..!؟ 
لآنها احلى منكْ..!؟ لا مو دا السبب ..اوقات تكوني انتي أحلى صح والا لا 
بس بالرغم من دا كلو طالعة عليها أحلى ..!؟
قطع الملآبس ماتفرّق بين الحلو واللي مو حلو ..> بالرغم من انو كلنا جميلين


"إن الله جميلٌ يحب الجمآل"
بس المشكلة عند بعض البنات انهم مايعرفوا يظهروا نقآط جمالهم 
او ماعندهم الخبرة في دا الشي او حتى يجهلوا هالنقطة .."
وانا أعتبرها النقطة المهمة والأساسية اللي ينطلق ويعتمد عليها كل شي..! 

س/ ليش القطعة اللي اشتريتيها ماكانت لآيقة عليكي وكآنت لآيقة على غيرك ..؟

لآنها ناسبتها وماناسبتكِ..كدا ببساطة ..

والسبب ..!؟ هوا دا اللي حأتكلم عنه بالتفصيل تحت تدوينة الجمآل هالمرة
+ تجيكي المناسبات والأعياد > وعيد الأضحى قّرب فحاولوا ماتخلوا العيد عيدين 
تلقي البنات لآبسين قطع أبداً مو مناسبة لأجسآمهم 
او تلقي الوحدة لآبسة شي يليق ع البنت الطويلة ؟ والطويلة لآبسة شي يليق
ع البنت القصيرة ، البيضاء لآبسة شي يليق ع السمرا والسمرا لآبسة شي يليق ع البيضاء
ووحدة لآبسة شي مو لآيق لهيكل ولا شكل جسمها ..


ليش الجسم له أشكآل ..!؟؟

ايوا له أشكال وهوا دا اللي حأتكلم عنه إن شاء الله .." 
........................


البعض يعرف هالشي والبعض يجهله والبعض يعرف بس مو عارف
كيف يلبس بما يناسب جسمو ..وزي ماهوا مهم اننا نلبس الالوان اللي
تناسب بشرتنا فالأهم اننا نلبس الحاجات اللي تناسب جسمنا .. بعض البنات جسمها جميل 
بس مشكلتها انها ماتعرف تختار الشي اللي يظهر جماله والبعض الآخر جسمها فيه عيوب 
بس دائما لها طلة جميلة كيف..؟ لانهاتلبس القصات والالوان اللي تناسب جسمها 
وتغطي العيوب وتظهر جوانب الجمال عندها .. 
هادي شغلة جدا مهمة لآزم يابنات نعرفها ومانتجاهلها .. مافي شي اسمو انا القصة هادي 
عجبتني او الموضة هادي لآزم البس منها .. لأنو اولاً واخيرا كلنا نلبس عشان نطلع بشكل حلو

قبل كل شي إسألي نفسك هل تناسبني هالقَصة؟ هل يناسبني هالفستان ..؟
كثير نسمع اوقات انو احد يقولك انتي نحفانة او انتي امتليتي من ناحية وناحية لا ..
واحيانا ويمكن ع الأغلب وزنك ثابت بس لبستي شي اعطى شعور للي حولك 
انو في شي تغّير في جسمك ..
إمابطريقة سلبية او إيجابية ..!!؟




بشكل عآم والأغلب انو الجسم له 4 اشكال والبعض قسّمها ل5 اقسآم 
بس الغالب والملحوظة هيا 4 اشكال

الاشكال الاربعة هيّا :

1-المستطيل : Rectangle او الهزيل والبعض سماه بالموزة جسم الـBanana
او المسطرة Ruler

2- الكمثرى Pear أو المثلث Triangle

3- التفاحةApple

4- الساعة الرملية Hourglass

واللي اضافوا شكل خامس سموه : الرياضيAthletic اللي هوا الجسم اللي يكون رياضي
بحت يعني مع عضلات واضحة واكتاف عريضة ...ألخ > هآدا ماحأتكلم عنو لآنو مو موجود عندنا
والبعض اعتبروا انو الجسم الرياضي والمستطيل لهم نفس الخيارات ..

أنا حأتكلم عن الأشكآل الأربعة اللي في الصورة تحت "





^ " حأتكلم عن كل شكل بصورة مفصّلة عشان كل وحدة تتعرف على شكل 
جسمها بشكل واضح فاللي حآبة تستفيد من التدوينة ياليت تقرأ الشكل اللي هيّا
شافت انو مطابق لمواصفاتها عشان يصير عندها فكرة واضحة عن الأخطاء او الحاجات
اللي لآزم تعدلها "
تابعو التدوينات اللي بعد هالتدوينة 
وتعرفو على أشكال أجسامكم و الأزياء المناسبة لها..