نصيحة قبل أن تبدائي في إختيار مستحضراتك ..!

…..

قبل كل شي حآبة ادردش معاكم شويآت بخصوص نقاط مهمّة وعآمةة

ويمكن اكككثركم يعرفها ويمكن البعض لآ.. او مامرت عليه او ماجات في باله 

او ما انتبه لها .. 

مايضر اننا ندردش كـ بنآت ..وننصح بعض..وهالدردشة مهمة جدا بالنسبة ليا

عشان لما اضيف الحاجات اللي استخدمها تكون كل هالأمور واضحة للجميع .

نقاط مهمة لازم نراعيها ..”

1- لا تعتمدي على تجارب الآخرين : 

كثير من البنات للأسف تقولكك فلانة جربته وفلانه قالت وفلانه مدحت

المنتج الفلاني ….. الخ .. وبعدين لما تجرب وماينفع معاها

تقول فلانة هاديكك كدابة وما اعرف ايش ويصير خبص في الكلآم

او ممكن تسب وتشتم في المندووبةة ..

وبعض المندوبات الله يهديهم يعطوا وعوود ويجيبوا لنفسهم الكلآم 

ويسيئوا لأنفسهم وللشركةة ..

ليش..؟

لانو دائما حطوا عندكم قاعدة مهمة اللي ينفع لغيرك ممكن ماينفع معاكي

واللي مانفع مع غيركك ممكن ينفع معاكي ..

بشرتنا تختلف ..حتى لو كانت بشرتكك مثلا: مختلطة او عادية او دهنية 

كمان تختلف.. يعني مو وحدة بشرتها عادية استخدمت كريم وناسبها

معناته لانو بشرتك انتي كمان عادية لآزم ينفع معاكي .. لا مو ضروري

كل وحدة فينا لها بشرتها اللي لها خصائصها المختلفة ..

وتغذيتك انتي تختلف عن تغذية غيرك ممكن انتي مهتمة بتغذيتك 

ممكن غيرك لا .. مهملة في تغذيتها 

لانو زي ما احنا عارفين التغذية لها كمان دور مهم .. 

قبل مانعالج من برا لآزم نعالج من جوا .. 

[ نفهم من هالنقطة انو مافي منتج سيء ومنتج ممتاز في شي

يناسبك وشي مايناسبك طبعا نتكلم عن المنتجات اللي جودتها كويسة]

…………………………..

النقطة التانية اللي بأكملها تحت حكاية [ لا تعتمدي على تجارب الآخرين ]

في بنات الله يهديهم تقولكك لا تجربي هالكريم ليش ..؟

انا جربته مافاد معايا وما اعرف ايش وتعالي شوفي البنات

كل ماكلمتها وحدة عن الكريم الفلاني قالتلها نصيحة لا تجربيه

صديقتي جربته وتقول مانفع ..!!!! 

اولاً: انتي تقدري تجزمي انو من الأساس يناسب بشرة صديقتتك.؟

تانياً: انتي متاكدة انها استخدمته الاستخدام الصحيح .؟

الاستخدام الصحيح : يعني استمرت عليه اقل شي شهر 

وكانت تحطه يوميا وبناءً على ارشادات استخدام الكريم 

يعني مو الكريم يتحط مرتين في اليوم وهيا كانت تحطه مرة وحدة

ومو تقولكك استخدمت ششهر ..وهيا تلاقيها تحطه يوم و3 و4 ايام

تسحب عليه وتقول انا استخدمته شهر ..

عشان كدا لا تاخذوا بكلآم احد ..اذا شفتوا منتج وحسيتو انكم

حابين تجربوه وحسيتوا براحة تجاهه لا تترددوا جربوه بأنفسكم 

وهادا مايعني النقطة اللي حأتكلم عنها دحين … 

…………………………..

2- لا تخلي من بشرتكك حقل تجارب : 

بعض البنات للأسف بشرتهم صارت حقل تجارب تمشي وتجرب في كل شي

لا تجربي الا الشي اللي انتي تكوني قريتي عنه .شوفتيه في مكان 

وحسيتي انه ممكن يحل لك مشاكلك..لآزم يكون في رغبة منكك تجاه

المنتج اللي حابة تجربيه .. مو كل شهر لك كريم ..لا ..غلط..

اعطي الكريم وقت عشان يعطي نتائجه من شهر الى 3 اشهر

كأقل تقدير .. 

مو كل وحدة تقولك في كريم انا جربته وروووعةة تقوليلها هاتيه

اذا ماتحتاجيه ليش تجربي ..!!!؟؟

بعض البنات صار عندهم ادمان تجارب الكريمات ويلقوا نفسهم بعد فترة 

من مصيبة لمصايب.. اذا استخدمتي كريم وماناسبكك

بالذات اذا كان كريم تبيض وغيرهه..اعطي بشرتك وقت عشان

ترتاح .. قبل ماتجربي عليها كريم جديد ..

وراعي الحاجات اللي قلتها فوق .. 

…………………………………..

3_ مو كل منتج غالي يعني بيكون هوا المناسب لك: 

طبعاً لو تلآحظوا انو كل النقاط ترجع لنقطة رئيسية وحدة اللي هيا

[ اللي ناسب غيرك مو لآزم يكون مناسب لك ]

بس هنا فكرة انو نربط سعر المنتج بفعاليته 

وانا قاعدة اقولكم هالكلام لاني كنت كدا ..» 

كنت لما اروح الصيدلية او اوقف عند ارفف العناية والكريمات وغيره

اللي اغلى شي آخذه …ليش ..؟

كان عندي اعتقاد انه بيكون معتنى فيه على الآخر 

وانو غالي لآنه اككثر واحد ممتاز ..

مع الوقت والتجارب غيّرت نظرتي واعتقادي .. 

والسبب : مرة من المرات ماخليت شي غالي لقيته الا حطيته

في ششعري ..لاني ابغاه يصير اكثف .. والشعرة تكون قوية 

ومانفع معايا..

وشفت مرة اعلان مجموعة بانتين ..وقلت في نفسي

جربت اللي اغلى منه ومانفع .. وما اعتقد انو حينفع بانتين.. 

وسألت بنت اختي قالت لا ياخالة لا تستخدمي بانتين 

انا استخدمته وما لآحظت اي تغير 

[ لاحظوا انو البنات هادا طبعهم اذا ماناسبها يعني هوا خايس 

خلاص يترمي في الزبالة المفروض ]

المهم سحبت على كلآمها .. وروحت واشتريت مجموعة بانتين

الكاملة تبع الكثافة اشتريت بديل الزيت + الشامبو + البلسم 

وبصصراحة لآحظت مع الاستخدام المستمر 

ان شعري صار كثيف والشعرة الوحدة سميكة

وماصدقت »

حتى اخواتي لآحظوا انو شعري صار اكثثثثثف 

4- لا تشتري شي ماتحتاجيه لمجرد [ الرغبة لا الحاجة ] :

في كل امورنا المفروض مانشتري شي الا اذا نحتاجه

[ اشتري ماتحتاج وليس ماتريد ]

لا تكوني مهوووسةة زي ماقولت فوووق..

البعض يروح يشتري شي نزل جديد او كريم شافت انو شكله ملفت

ليش ..!؟ عجبني شكله قالوا انو جديد وحابة اجربه 

اذا انتي عندك اللي نافع معاكي وماشية عليه ليش تجربي؟

ليش تشتري ؟ ليش تلخبطي في الكريمات ؟

وقفت مرة عند كوشكك تبع شركة ” باباريا ” اذا تعرفوا

هالششركة هيا تبع منتجات عناية وكدا للبشرة

عشان احب اشتري منهم حليب للجسم .. [ حاوريكم هوا إن شاء الله ]

وقعدت تنصحني بمنتجات تانية وكدا .. ونصحتني بكريم 

الليل والنهار قلتلها لا ششكرا .. 

قالتلي طيب انتي تستخدمي كريم لليل والنهار 

قلتلها ايوا ..

قالت ايش تستخدمي : قلتلها “ اولآي ” 

حاولت تقنعني اجرب منتجهم لليل والنهار وانو يغذي وما اعرف ايش

قلتلها انا من ايام الجامعة وانا استخدم اولاي 

ومستحيل اغيّر لكريم تآني ..لآني مرتاحة مع 

[ مجموعة اولآي الليل والنهار المرطبة ]

ومعطيتني النتجية اللي ابغاها وأككككككثر 

فليش اقعد ادوّر على شي وهوا عندي..!!؟

سكتت وماعاد قالت شي..» ياقويةة ههه 

لا جد .. هوا هادا المنطق ليش نجرب كريمات تانية اذا عندك اللي

ماشي مع بششرتكك ومرتاحة لنتائجه خلاص خليكِ عليه

العمر كله .. احنا نقعد ننط من منتج للتاني عشان بس

نلقى اللي يناسبنا وكم نخسر في الكريمات بس عشان 

نلقى شي يعطينا نتائج مرضية..ولما نلقى نقوم نغيّر

هادي كريمات مو ملآبس تغيريها كل شويةة ..

ويمكن اللي حتغيري له يطلع في الأخير مايناسبكك

وترجعي لكريمك القديم [ قديمكك نديمكك ]

وليش الشحططة هادي من البداية ..!!

خليكي قنوعة وراضية باللي في يدكك ..

…………………………….

اتمنى اني ما اكون ازعجتكم بهالثرثرة وان شاء الله 

يكون اي احد فيكم استفاد من هالنصائح ..

يمكن البعض فينا احتاج وقت ومشوار طويل من التجارب

عشان اخيرا يعرف هالشي وبعضنا كان في الشخص

الواعي والحكيم اللي قدم له النصائح على طبق من ذهب 

واختصر عليه مشوار طويل ووفر له الكثير من المصاريف

وان شاء الله اكون وحدة من هالأشخاص 

اللي اختصرت للبعض منكم هالشي..